Agroabegondo abríu as súas portas este domingo ás 10:00 horas e permanecerá aberta ao público até as 21:00 horas. No campo de San Marcos danse cita empresas e profesionais relacionados co mundo do campo. Así, a agricultura tradicional, a agricultura ecolóxica, as enerxías renovables e as novas tecnoloxías van ter o seu espacio na edición de Agroabegondo deste ano. Ademáis, nesta edición por primeira vez, a Consellería do Medio Rural vai instalar unha carpa de 150 metros cadrados no Campo de San Marcos para acoller os stands da Dirección Xeral de Montes, Banco de Terras, SEAGA e o CIAM - Centro de Investigacións Agrarias de Mabegondo-.

O programa da Feira comprende, unha exposición de maquinaria agrícola, stands agropecuarios, stand da Consellería do Medio Rural, unha xuntanza cabalar, obradoiros e xogos infantis e a actuación durante a feira dunha charanga. A Concellería de Promoción Económica preparou degustacións gratuítas, entre as 13:00 e as 14:00 horas os visitantes de Agroabegondo puideron degustar un menú de paella e pola tarde, entre as 18:00 horas e 19:00 horas, poderase participar nun magosto.

Para os pequenos

Os máis pequenos van ter a posibilidade de participar en dous obradoiros ao longo do día. Así, a partir das 12:00 horas o recinto feiral acolle un obradoiro de Pan, no que os nenos e nenas poden facer pan, desde o amasado até a conción dos bolos. Este obradoiro está organizado e desenvolto pola Asociación de Panadeiros de Carral, que xa colaborou na primeira edición de Agroabegondo. Pola tarde haberá, tamén para os pequenos, un obradoiro mediambiental a partir das 17:00 horas no Campo de San Marcos.

A concelleira salientou que, o programa da segunda edición de Agroabegondo ten un abano de actividades coas que se quere ofrecer ao visitante argumentos para aproveitar este fin de semana para achegarse a Abegondo e coñecer a riqueza e as oportunidades da nosa terra. Insua destacou que, poñer en valor o potencial agrícola e forestal do municipio é unha das líneas de traballo que está a desenvolver o goberno de Abegondo, un municipio con 83,9 kilómetros cadrados e unha zona de transición entre as terras mariñás e as terras altas da Galicia interior.